Kryeministri Edi Rama, në cilësinë e kryetarit të Partisë Socialiste, ka zhvilluar një tjetër takim elektoral në qytetin bregdetar të Durrësit, në kuadër të fushatës për zgjedhjet parlamentare të 11 majit. Në fjalën e tij, Rama u shpreh me tone të ashpra ndaj kundërshtarëve politikë, të cilët, sipas tij, do të përballen me një humbje edhe më të thellë pas përfundimit të procesit zgjedhor.

“Durrësi do t’i japë një shtytje më të fortë leshterikëve më 11 maj,” deklaroi kreu i qeverisë, duke përdorur një gjuhë të fortë politike ndaj opozitës. “Një shtytje që do t’i rrudhë edhe më shumë.”

Duke vlerësuar pjesëmarrjen e qytetarëve në takimin elektoral, Rama theksoi se nëse kjo frymë përkthehet në një pjesëmarrje masive në votime, atëherë Partia Socialiste do të arrijë një rezultat rekord në qarkun e Durrësit. “Nëse do ketë një masivitet si ky që ka sot këtu, dhe nëse të gjithë që jeni sot këtu jeni pararoja e atyre që do shkojnë në qendrën e votimit, atëherë Durrësi do të thyejë rekordin e vet duke marrë 9 mandate për Partinë Socialiste,” theksoi Rama.

Fushata e PS në Durrës synon mobilizimin maksimal të votuesve në një qark strategjik, ndërsa vetë Rama ka intensifikuar daljet publike në prag të 11 majit, duke bërë thirrje për pjesëmarrje të gjerë në zgjedhje.