Kryeministri Edi Rama ka reaguar ashpër ndaj akuzave që kërkojnë largimin e tij për shkak të përfshirjes së disa personave të qeverisë në procese gjyqësore. Duke folur për mediat, ai e quajti këtë një përpjekje pa bazë, duke theksuar se përmes këtyre akuzave, disa individë po kërkojnë të realizojnë atë që nuk mund ta arrijnë në fushatën zgjedhore.

“Ku i ke parë këto dorëheqjet me asociacion? Unë e di që tanimë kjo historia e proceseve gjyqësore është shpresa e vetme jo vetëm e kënetës së madhe, por edhe e moçaleve të vogla, se atë që nuk realizojnë në fushën e ballafaqimit elektoral me popullin, mendojnë se mund ta realizojnë duke nxitur SPAK dhe duke shpresuar se do të shkrijë PS,” tha Rama, duke u referuar kritikëve që kërkojnë të godasin partinë e tij përmes hetimeve dhe proceseve ligjore.

Kryeministri u shpreh gjithashtu se ata që bëjnë presion për të arritur këto rezultate janë të verbër ndaj realitetit, duke shtuar se populli është më i zgjuar dhe nuk është i prirur të besojë në propagandë të tillë. “Populli ka një kujtesë dhe për një arsyetim,” theksoi Rama.

Ai ngriti pyetje të forta duke iu drejtuar kritikëve: “Pse nuk ndodhën përpara këto procese? Pse nuk ndodhi që të shikonim dikë në pushtet që të hetohej, ndalohej, gjykohej e dënohej? Pse ndodh sot? Për shkakun tënd apo të kënetës tënde?”

Duke i lidhur këto akuza me përpjekjet për të pastruar emrat dhe përfitime të ngushta, Rama kritikon edhe përpjekjet për të përdorur drejtësinë në mënyrë të manipuluar. Ai ironizoi se “shkojnë për të futur bufin në lavanderi që t’i pastrohet damka e turpit nga balli,” duke iu referuar atyre që janë të përfshirë në skandale, ndërsa ngre pyetje për burimin e parave që janë shpërndarë për të mbrojtur interesat e ngushta.