Kryeministri Edi Rama ka ndarë pamje nga kantieri i punimeve në portin e ri turistik të qytetit të Durrësit, duke theksuar se projekti po merr formë dhe do të transformojë zonën në një destinacion tërheqës për turistët.

Në një postim në rrjetet sociale, Rama shprehet se porti turistik do të ofrojë një gamë të gjerë shërbimesh, duke përfshirë hotele, apartamente, dhe akses 24/7 për vizitorët nga Shqipëria dhe të huajt.

Projekti, sipas Ramës, jo vetëm do të zhvillojë zonën, por gjithashtu do të ndikojë pozitivisht në mjedisin e kësaj zone, duke i dhënë fund ndotjes së rëndë mjedisore që ka ekzistuar për shumë vite.

“Mirëmëngjesi dhe me kantierin e portit të ri turistik në Durrës, ku po merr formë plazhi i ri që do të ofrojë një tjetër hapësirë jete si vendpushim cilësor, me njësitë e shërbimit, hotelet, apartamentet dhe aksesin 24/7 për turistët e huaj e për vizitorët nga Shqipëria, po edhe do të shërojë një gangrenë të rëndë mjedisore në atë zonë të ndotur nga aktiviteti tregtar pa asnjë standard mjedisor prej shumë dekadash, ju uroj një javë të mbarë”, shkruan Rama.