Në takimim e sotëm me fermerët e Dvoranit në Korçë, kryeministri Edi Rama u ka gjetur “zgjidhjen” banorëve duke sugjeruar që të bëhen aksionerë minimalë ashtu si bashkia dhe qeveria, për ndërtimin e një fabrike të përpunimit të frutave.

Rama theksoi se 20% e pjesës së mbetur nga eksportet mund të përpunohet dhe kështu asnjë kokërr molle nuk shkon dëm. Veç këtyre ai tha se do ketë një “super-taksë” për të gjithë ata fermerë që lënë tokat e tyre djerrë.

“Kemi shpërndarë 8 milionë litra naftë falas për fermerët. Nuk na mjafton më që të marrim dhe të eksportojmë mollë, na duhen komposto dhe reçel, edhe pikat e përpunimit sepse keni një shifër këtu që 80% e prodhimit është e shitur, por ka një 20% që ka problem cilësie, e ky shkon për përpunim. Na duhet fabrika, na duhet një financim që nuk mund ta presim ta sjellë tregu por duhet ta garantojmë sëbashku, ju duke futur një shumë minimale për të qenë aksionerë, bashkia pjesën e saj, qeveria pjesën e saj. Ky është vetëm një shembull por ka plot të tjerë, që Korça të bëhet kampione, të mos lëmë asnjë kokërr frut të shkuar dëm.

Javë pas jave po shohim që mund të arrijmë gjysëm miliardë euro eksporte bujqësore, Shqipëria që deri dje i kishte lënë rrugëve fermerët. Po i përgatisim një super taksim për lënien djerrë të tokës, për titujt e pronësisë në zona të caktuara, në mënyrë që të shfrytëzojmë çdo metër katror.Sot punohet dyfish sepse kemi çuar ujin në parcelë, ka një rrjet pikash grumbullimi, që duhet shtuar ama e kemi”-tha Rama.