Kryeministri Edi Rama duket se ka zbutur qëndrimin e tij ndaj platformës TikTok pas një takimi me një zyrtare të kompanisë. Sipas raportimeve të mediave ndërkombëtare, përfshirë agjencinë franceze të lajmeve AFP, takimi është vlerësuar si konstruktiv dhe mund të çojë në një rishikim të qëndrimit të qeverisë shqiptare mbi këtë rrjet social.

AFP thekson gjithashtu se kthesa e Ramës përkon me vendimin e presidentit të SHBA-ve, Donald Trump, i cili nënshkroi një dekret për të pezulluar përkohësisht ndalimin e TikTok në Amerikë. Trump i ka dhënë kompanisë një afat 75-ditor për të gjetur një zgjidhje, përfshirë mundësinë e shitjes së platformës, për të shmangur ndalimin përfundimtar.

Kjo situatë ka hapur diskutime mbi qasjen e vendeve të ndryshme ndaj sigurisë dhe privatësisë në platformat e mediave sociale. A do të vazhdojë TikTok të jetë pjesë e jetës virtuale të shqiptarëve? Kohët e ardhshme do të jenë vendimtare.