Vdekja e parakohshme e ish-deputetit të Partisë Demokratike, Gerti Bogdani, ka ngjallur reagime të thella dhe ngushëllime nga të gjitha anët e spektrit politik, përfshirë edhe Qeverinë. Kryeministri Edi Rama ishte ndër të parët që shprehu keqardhjen e tij për këtë humbje tragjike, duke ndarë ngushëllime për bashkëshorten dhe familjen e Bogdanit.

“Keqardhje për ndarjen kaq të parakohshme nga jeta dhe ngushëllime bashkëshortes e familjes Bogdani!” shkroi Rama.

Kryetarja e Kuvendit, Elisa Spiropali, gjithashtu shprehu dhimbjen e saj, duke thënë: “Dhimbje e thellë për ndarjen nga jeta të kolegut tonë, ish-deputetit të Kuvendit të Shqipërisë, babait, bashkëshortit, birit, Gerti Bogdani. Na trondite me ikjen tënde, Gert! Ike shumë i ri, vetëm 44 vjeç! Ngushëllime nga zemra familjes! U prehsh në paqe! Të ndrittë shpirt!“.

Deputeti demokrat, Ervin Salianji, reagoi gjithashtu me tronditje për humbjen e mikut të tij: “E pabesueshme, kjo ikje pa kohë Gert! Tronditës lajmi për ndarjen e parakohshme nga jeta e mikut dhe ish-kolegut Gerti Bogdani. Një nga djemtë më të mirë në Partinë Demokratike, një nga të rinjtë më energjik dhe kontributor i palodhur që nga Forumi Rinor dhe deri në Parlamentin e Shqipërisë! Ngushëllime të sinqerta Edlirës, familjes dhe miqve! Prehu në paqe Gerti!“.

Edhe kreu i Partisë së Lirisë, Ilir Meta, shprehu trishtimin e tij të thellë, duke e cilësuar vdekjen e Bogdanit si një “humbje të pazëvendësueshme”: “Gjatë gjithë angazhimit të tij politik, ai krijoi një model pozitiv për të rinjtë duke i nxitur të jenë pjesë e vendimmarrjes,” tha Meta, duke përcjellë ngushëllimet e tij për familjen.