Deputeti socialist Erion Braçe ka reaguar me emocion pas lajmit për ndarjen nga jeta të ish-kryeministrit dhe ish-kreut të Partisë Socialiste, Fatos Nano.

Në një postim në rrjetet sociale, Braçe ka shprehur mirënjohjen e tij të thellë për figurën e Nanos, duke e cilësuar si arkitektin e rilindjes së së majtës shqiptare pas rënies së komunizmit.

“Fatos Nano, njeriu që ribëri të majtën shqiptare, u shua sapo!
Pusho në paqe dhe faleminderit për gjithçka!” – shkroi Braçe.

Nano, një nga personalitetet më me ndikim të politikës shqiptare të tranzicionit, ishte themeltari dhe drejtuesi i parë i Partisë Socialiste të Shqipërisë, të cilën e udhëhoqi nga viti 1991 deri në vitin 2005.
Gjatë karrierës së tij, ai ka mbajtur disa herë postin e kryeministrit të vendit dhe është vlerësuar për rolin e tij në transformimin e Partisë së Punës në një forcë moderne socialdemokrate që përshtatej me realitetin pluralist të Shqipërisë.

Reagimi i Braçes vjen mes një vale ngushëllimesh nga personalitete të shumta të politikës e shoqërisë shqiptare, që po nderojnë kontributin e Fatos Nanos, figurë e cila la gjurmë të thella në historinë e shtetit dhe të së majtës shqiptare.