Kreu i grupit të PD, Gazment Bardhi, i është përgjigjur ambasadorit të Bashkimit Evropian, Silvio Gonzato, i cili gjatë vizitës së tij në Kuvend shprehu shpresën se opozita do të luajë rolin e saj. Bardhi ka ndarë një foto të deputetëve të përjashtuar jashtë Kuvendit, duke theksuar se kjo është situata e vërtetë dhe se fshehja e realitetit pas fjalëve të bukura nuk e ndihmon Shqipërinë.

Ai theksoi se opozita është përjashtuar në mënyrë të paligjshme, duke e bërë këtë me një rregullore që ishte shfuqizuar prej tre muajsh nga Gjykata Kushtetuese. “Bëhet thirrje që opozita të luajë rolin e saj brenda Parlamentit; ndërkohë mundësia e opozitës për të hyrë dhe për të patur mundësi të luajë rolin e saj paraqitet kështu në realitet! Fshehja e realitetit pas fjalëve të bukura nuk e ndihmon Shqipërinë,” tha Bardhi.

Ai theksoi rëndësinë e respektimit të Kushtetutës si themeli i parlamentit dhe si mundësia e vetme për bashkëjetesën mes palëve me mendime të ndryshme. Bardhi përfundoi duke theksuar se nëse Kushtetuta vazhdon të shkelet, mundësia për një bashkëjetesë parlamentare mes mazhorancës dhe opozitës do të zerohet.