Mjeku Ilir Shani, i cili kreu ndërhyrjen kirurgjikale tek 54-vjeçarja që humbi jetën në një spital privat në Durrës, ka folur për Top Channel lidhur me ngjarjen.

Sipas tij, pacientja ishte ekzaminuar më parë dhe kishte kryer koronarografi në Milano, ku i ishte rekomanduar të bënte rënie në peshë. Operacioni i ngushtimit të stomakut, që është një ndër më të përhapurit në Europë dhe Amerikë, nuk është i lirë nga komplikacionet, të cilat në disa raste mund të arrijnë deri në 7%.

“Mënyra e operacionit shkoi normalisht, ajo doli në pavion, komunikonte dhe lëvizte pa shqetësime. Por natën e ditës së dytë u zgjua papritur, nuk mundi të flasë dhe brenda disa minutash ndërroi jetë, pavarësisht manovrave të ndihmës. Sipas raportit paraprak, shkaku dyshohet të jetë infarkt masiv i miokardit,” tha mjeku.

Ai theksoi se ndihma u dha menjëherë, por gjendja ishte e pakthyeshme. “Aludime dhe akuza ka shumë, por le ta hetojnë organet kompetente. Pacientja nuk ishte kardiake, pasi kishte bërë koronarografi dhe ishte në proces për rënie peshe,” përfundoi Shani