Detaje të reja dalin nga ngjarja tragjike në Durrës, ku një 41-vjeçare, Bedrie Loka, ka kryer vetëvrasje duke pirë fotoksinë. Shkak për këtë akt dyshohet se është bullizimi nga kolegët e saj në vendin e punës, të cilët pretendojnë se nuk kanë patur lidhje me ngjarjen.

Familjarët e të ndjerës argumentojnë se ajo ishte bullizuar në rrjetin social Tik Tok, me hapjen e një faqeje denigruese, dhe se policia ishte në dijeni të kësaj situate. Megjithatë, kolegët dhe pronari i kompanisë ku punonte mohojnë çdo përfshirje në bullizim dhe theksojnë se ngjarja ndodhi në ambientet e banesës së saj.

Sipas burimeve, 41-vjeçarja kishte ankuar më parë tek pronari pa gjetur një zgjidhje. Kompania prodhonte litarë në zonën e Fllakës për tragetët.

Bedrie Loka ishte nënë e katër fëmijëve, dhe sipas familjarëve, nuk kishte probleme të tjera si financiare apo të tjera. Familja është shprehur se ajo kishte thënë se do të kryente vetëvrasje për shkak të bullizmit, por nuk kishte gjetur mbështetje. Ndërsa hetimet vijojnë, ngjarja ka tronditur opinionin dhe ka ngritur debat mbi rolin e bullizmit në shoqëri.