Real Madridi është detyruar të fshijë dhe të ripublikojë videon zyrtare të homazheve për futbollistët e ndarë nga jeta gjatë vitit 2025, pas një gabimi të rëndë të stafit të rrjeteve sociale. Në materialin e shfaqur në mbledhjen e fundit të klubit, krahas shumë lojtarëve që humbën jetën, ishte përfshirë edhe vdekja tragjike e Diogo Jotës dhe e vëllait të tij, André Silva.

Megjithatë, në vend që të shfaqej fotografia e vëllait të Jotës, ekipi mediatik i Real Madridit vendosi gabimisht imazhin e sulmuesit të Elche-s, André da Silva, i cili është gjallë dhe aktiv në La Liga.

Pas reagimeve të menjëhershme, klubi madrilen e fshiu videon dhe publikoi një deklaratë zyrtare ku kërkonte falje:

“Real Madrid C. F. i kërkon falje Elche C. F.-së dhe lojtarit të saj, André da Silva, përfshirjes gabimisht në një video institucionale të imazhit të tij në vend të atij të André Silva-s, vëlla i Diogo Jota-s. Ne e kërkojmë ndjesë me keqardhje për atë që ndodhi.”

Gabimi ka ngjallur komente të shumta në rrjetet sociale, ndërsa ndeshja e radhës në La Liga mes Real Madridit dhe Elche-s mund të kthehet në një moment të sikletshëm kur André da Silva të përballet me klubin që e ngatërroi në videon zyrtare të homazheve.