Droga ‘kaptagon’, e njohur si “kokaina e të varfërve”, ka siguruar përfitime me vlerë miliarda dollarë në vit për regjimin e presidentit sirian Bashar al-Assad. Por tani, rebelët e grupit Hayat Tahrir al-Sham kanë marrë kontrollin dhe po shkatërrojnë fabrikat shtetërore që prodhonin këtë drogë.

Një prej fabrikave kryesore ndodhej në Douma, rreth 20 kilometra në verilindje të Damaskut. Dikur një fabrikë për patate të skuqura, ajo u transformua në një qendër prodhimi për ‘kaptagon’.

Sipas dëshmisë së Basel-it, një anëtar i grupit rebel, droga shpesh fshihej brenda pajisjeve elektrike dhe më pas eksportohej jashtë vendit. Vëllai i Bashar al-Assadit, Maher al-Assad, akuzohet si drejtuesi kryesor i këtij rrjeti të sofistikuar të trafikut të drogës.

Sipas Institutit New Lines, tregtia me ‘kaptagon’ siguronte rreth 2.4 miliardë dollarë në vit për regjimin sirian, duke ndihmuar në zbutjen e efekteve të sanksioneve ndërkombëtare.

Rebelët thonë se kanë zbuluar deri në 160 fabrika të ngjashme në Siri dhe dokumente që përmbajnë detaje të rrjetit ndërkombëtar të shpërndarjes. Në vitin 2023, qeveria britanike vlerësoi se 80% e furnizimit global të ‘kaptagonit’ vinte nga Siria.

Tani, rebelët e Hayat Tahrir al-Sham janë zotuar të shkatërrojnë përfundimisht këtë “perandori droge”, duke deklaruar se financimi i aktiviteteve të tyre përmes shitjes së drogës nuk përputhet me vlerat e tyre.