Për herë të parë, emigrantët do të kenë mundësinë të ushtrojnë të drejtën e votës në zgjedhjet e vitit të ardhshëm, pa qenë e nevojshme të udhëtojnë në Shqipëri. Kjo do të realizohet përmes një sistemi të ri të identifikimit elektronik që do të lejojë votimin në vendin ku ata ndodhen.

Për të bërë të mundur këtë avancim dhe për të përgatitur sistemet e nevojshme për zgjedhjet e 2025-ës, qeveria shqiptare ka ndarë një fond shtesë prej 351 milionë lekësh për Komisionin Qendror të Zgjedhjeve (KQZ). Ky fond do të përdoret për të avancuar procedurat e prokurimit dhe për të garantuar implementimin e plotë të fondeve për procesin zgjedhor.

Nga kjo shumë, 250 milionë lekë do të përdoren për përgatitjet për zgjedhjet, ndërsa 101 milionë lekë do të shpenzohen për planifikim, menaxhim dhe administrim të brendshëm të KQZ-së. Ky rishikim buxhetor dyfishon buxhetin e KQZ-së, që nga 300 milionë lekë që ishte në 651 milionë lekë.

Për zgjedhjet e ardhshme parlamentare janë planifikuar edhe fonde të tjera për vitin e ardhshëm. Sipas dokumenteve të Ministrisë së Financave, në buxhetin e vitit 2025 do të caktohen 2 miliardë lekë si fond rezervë për organizimin e zgjedhjeve. Këto fonde do të mbështesin implementimin e votimit elektronik, numërimit elektronik dhe sistemit elektronik të identifikimit të votuesve.

Për realizimin e këtyre qëllimeve, Komisioni Qendror i Zgjedhjeve ka kërkuar një fond ekstra prej afro 4.6 miliardë lekësh për zgjedhjet e 2025-s. Ky fond do të përdoret për shtimin e pajisjeve për votim, numërim dhe identifikim elektronik, si dhe për shpërblimin e anëtarëve të KZAZ, KQV, GNV dhe trajnuesve të tyre, si dhe për punonjësit e përkohshëm që do të angazhohen në procesin zgjedhor.