Prezenca e OSBE në Tiranë mbështet fushatën e kreut të KQZ, Ilirjan Celibashi, për të publikuar të gjitha rekomandimet e OSBE/ODIHR për zgjedhjet parlamentare të 25 prillit dhe duke bërë thirrje për përmbushjen e tyre.

Përmes një postimi në facebook, OSBE thekson gjithashtu se inkurajon të gjitha autoritetet shqiptare për të vënë në zbatim rekomandimet e bëra prej tyre për 25 prillin.

“I bashkohemi fushatës ndërgjegjësuese të Komisionerit Shtetëror të Zgjedhjeve Ilirjan Celibashi për rekomandimet e OSBE/ODIHR-it në raportin e zgjedhjeve të fundit dhe i inkurajojmë autoritetet shqiptare t’i vënë ato në zbatim”, thuhet në postimin e OSBE-së.

Më herët, gjatë ditës së sotme, Celibashi publikoi rekomandimin 23 dhe të fundit të raportit të ODIHR, ndërsa shkruante se “𝗥𝗲𝗸𝗼𝗺𝗮𝗻𝗱𝗶𝗺𝗶 𝗶 𝟮𝟯-të dhe i fundit i Raportit Përfundimtar të OSBE/ODIHR për Zgjedhjet e 25 Prillit 2021 në Shqipëri! Koha për t’i përmbushur ka filluar!”