Reperi i njohur, Noizy, ka vendosur të vetëdorëzohet në policinë e Kosovës pas disa muajsh në kërkim për akuzat e dhunës ndaj personazhit të TikTok, Medi Iseni. Noizy, i cili mban emrin e vërtetë Rigels Rajku, është dorëzuar në stacionin policor të Pejës, ku është njoftuar se do të ndalohet për 48 orë me vendim të prokurorit.

Ky zhvillim vjen pas një ngjarjeje të ndodhur më 2 gusht, kur Noizy, së bashku me shtatë persona të tjerë, është akuzuar për dhunë brutale ndaj Medi Isenit dhe mikut të tij, Bekim Hardergjonaj, brenda një klubi nate në Pejë. Iseni ka pohuar se ishte ftuar nga reperi tjetër shqiptar, Stresi, për një takim, por më pas është gjetur në një “kurth” ku u përball me Noizyn dhe grupin e tij.

Ndërkohë, Stresi, i cili gjithashtu ishte shpallur në kërkim për këtë ngjarje, u vetëdorëzua më 1 nëntor. Të dy reperët tani janë përballur me akuza të rënda, dhe hetimet janë duke vazhduar për të zbardhur ngjarjen e dhunshme në Pejë.