Reperi i njohur xhamajkan, Sean Kingston, është dënuar me 3 vite e gjysmë burg federal për rolin e tij në një skemë mashtrimi prej rreth 1 milion dollarësh. Vendimi u dha këtë të premte nga gjykatësi amerikan David Leibowitz në një gjykatë në Floridën Jugore.

Përpara shpalljes së dënimit, Kingston, 35 vjeç, kërkoi falje dhe tha se kishte nxjerrë mësime nga veprimet e tij. Megjithatë, gjykatësi hodhi poshtë kërkesën e avokatëve për t’i dhënë mundësinë që ai të vetëdorëzohej në një datë të mëvonshme për shkak të problemeve shëndetësore. Në vend të kësaj, Leibowitz urdhëroi që reperi të merrej menjëherë në paraburgim.

I veshur me një kostum të zi dhe këmishë të bardhë, Kingston u pa duke hequr xhaketën teksa i vendoseshin prangat, për t’u shoqëruar menjëherë jashtë sallës së gjyqit.

Në mars 2025, Kingston, i lindur me emrin Kisean Paul Anderson, dhe nëna e tij Janice Eleanor Turner, u shpallën fajtorë për katër akuza për mashtrim elektronik dhe një akuzë për komplot për mashtrim elektronik.

Turner, 63 vjeç, u dënua muajin e kaluar me 5 vite burg, shumë më pak se maksimumi prej 20 vjetësh që ajo dhe djali i saj përballeshin fillimisht.

Ky vendim shënon një tjetër goditje për figurën e dikurshme të njohur të skenës muzikore, i cili njihej për hitet e tij ndërkombëtare, por që prej disa vitesh është përfshirë në probleme të vazhdueshme ligjore.