Gjatë pasdites së sotme, moti i keq ka përfshirë disa zona të Kosovës, duke shkaktuar reshje të dendura shiu të shoqëruara me breshër, që kanë sjellë përmbytje, dëme materiale dhe ndërprerje të furnizimit me energji elektrike.

Ndër zonat më të goditura janë Brezovica, Gjilani, Ferizaj dhe disa fshatra në komunën e Gjakovës. Pamjet e shpërndara në rrjetet sociale tregojnë rrugë të përmbytura, oborre të mbuluara nga uji dhe shtresa të trasha breshëri që kanë mbuluar tokën në shumë prej këtyre zonave.

Në Brezovicë, rruga kryesore që të çon drejt qendrës turistike është bërë e pakalueshme për automjetet për shkak të ujërave të shumtë. Edhe në Gjilan situata është përkeqësuar ndjeshëm, me rrugë të bllokuara dhe ndërtesa në katet e ulëta të rrezikuara nga përmbytjet. Qarkullimi është vështirësuar ndjeshëm, ndërsa qytetarët janë parë duke u përpjekur të mbrojnë banesat dhe bizneset nga uji.

Në Ferizaj, sistemi i kanalizimit nuk ka përballuar sasinë e madhe të reshjeve, duke shkaktuar përmbytje të konsiderueshme në disa pjesë të qytetit. Ndërkohë, në komunën e Gjakovës, breshëri i madh ka dëmtuar zona të tëra bujqësore dhe fshatra, duke ngritur shqetësime për dëmet në kultura dhe banesa.

Kompania për Distribuimin e Energjisë Elektrike në Kosovë (KEDS) ka njoftuar se moti i rëndë ka shkaktuar dëme të shumta në rrjetin elektrik, veçanërisht në rajonin e Anamoravës, duke lënë pa energji elektrike një numër të madh konsumatorësh.

“Ekipet tona janë në terren dhe po punojnë pa ndërprerje për të rikthyer furnizimin me energji sa më parë që të jetë e mundur”, thuhet në komunikatën zyrtare të KEDS-it.

Autoritetet lokale po ndjekin situatën nga afër dhe u kanë bërë thirrje qytetarëve që të shmangin lëvizjet e panevojshme dhe të tregojnë kujdes të shtuar në zonat më të rrezikuara. Meteorologët paralajmërojnë se reshjet dhe moti i paqëndrueshëm do të vijojnë edhe në orët në vijim.