Gjatë gjithë ditës së martë, reshjet intensive të shiut kanë vijuar në të gjithë vendin, duke krijuar vështirësi në disa zona. Strukturat në varësi të Ministrisë së Infrastrukturës dhe Energjisë kanë qenë të angazhuara që prej mbrëmjes së djeshme për menaxhimin e situatave të emergjencës.

Situata në rrugë
• Rajoni Verior: Qarkullimi i mjeteve vazhdon normalisht, kontraktorët janë në gatishmëri, temperaturat pozitive.
• Rajoni Jugor: Shumica e akseve janë të qarkullueshme, me përjashtim të segmentit Krane – Syri i Kaltër, ku uji ka dalë në rrugë pranë liqenit të HEC Bistrica 3. Struktura e mirëmbajtjes dhe Policia Rrugore ndodhen në terren. Qarku i Korçës raportohet normal.

Furnizimi me energji elektrike
• Aktualisht 21 fidera janë jashtë pune, kryesisht në zonat rurale dhe malore të veriut.
• Dy linja 35 kV paraqesin ndërprerje për disa nënstacione në Malësinë e Madhe dhe Nënshkodër.
• Janë regjistruar stakime të përkohshme të disa linjave 110 kV dhe 220 kV për shkak të motit, të cilat janë rikthyer menjëherë në punë.

Situata në kaskadën e Drinit
• Reshjet vijojnë me intensitet të lartë (4–20 mm/orë), duke shkaktuar rritje të prurjeve deri pas mesnatës.
• Në pellgun ujëmbledhës Koman–Vau i Dejës janë regjistruar rreth 180 mm reshje.

Furnizimi me ujë dhe infrastruktura
• Sistemet e ujësjellësit dhe kanalizimeve funksionojnë normalisht, me grupet e gatishmërisë në terren 3 turne në ditë.
• Portet e Durrësit dhe Sarandës, si dhe Aeroporti “Nënë Tereza”, operojnë normalisht, megjithëse disa fluturime janë vendosur në pritje për shkak të motit.

Strukturat e MIE vijojnë monitorimin e situatës dhe ndërhyrjen aktive për të garantuar funksionimin e shërbimeve jetike, pavarësisht reshjeve intensive dhe problematikave të regjistruara.