Reshjet e pandërprera të shiut që nga mesnata kanë shkaktuar vërshime dhe dëme të konsiderueshme materiale në disa komuna të Kosovës, veçanërisht në Malishevë dhe Drenas. Situata e rënduar ka prekur edhe Rahovecin, ku si pasojë e përmbytjeve janë shënuar ndërprerje të energjisë elektrike në disa zona.

Autoritetet lokale kanë konfirmuar se, për arsye sigurie, janë detyruar të evakuojnë disa banorë nga zonat më të rrezikuara, ndërsa strukturat e emergjencave civile ndodhen në terren për të monitoruar situatën dhe për të ofruar ndihmë.

Vërshimet kanë shkaktuar dëme në infrastrukturë, rrugë dhe prona private, ndërsa reshjet intensive vijojnë të mbajnë të lartë nivelin e rrezikut. Autoritetet u bëjnë thirrje qytetarëve të shmangin zonat e prekura dhe të ndjekin udhëzimet zyrtare.

Në fotogalerinë më poshtë paraqiten pamje nga Malisheva dhe Drenasi, të cilat ilustrojnë qartë dëmet e shkaktuara nga moti i keq.