Rihanna, një nga ikonat më të mëdha të muzikës pop dhe R&B, pritet të rikthehet fuqishëm në skenë në vitin 2026, duke nisur një turne të shumëpritur, i cili do të përkojë me 10-vjetorin e albumit të saj të fundit, Anti.

Ylli 37-vjeçar, aktualisht në pritje të fëmijës së tretë me partnerin ASAP Rocky, kishte planifikuar disa koncerte këtë verë në Londër, në stadiumin e West Ham, por ato u anuluan në moment të fundit. Megjithatë, sipas burimeve për tabloidin britanik The Sun, këto data do të zëvendësohen me një rikthim madhështor vitin e ardhshëm.

“Rihanna dhe ekipi i saj janë të bindur se mund ta realizojnë vitin e ardhshëm,” citon burimi, duke shtuar se një album i ri është në përgatitje dhe se këngëtarja po punon për diçka që do të “justifikojë pritjen” disavjeçare të fansave.

Prej publikimit të Anti në vitin 2016, Rihanna është fokusuar në projekte të tjera, përfshirë linjat e saj të suksesshme të modës dhe kozmetikës, Fenty Beauty dhe Savage x Fenty, si dhe në jetën e saj familjare.

Së fundmi, ajo është shfaqur në tapetin e kuq për promovimin e filmit të animuar Smurfs, ku i shoqëruan edhe dy djemtë e saj, RZA dhe Riot.

Këngëtarja e hitit “Umbrella” nuk ka konfirmuar ende një datë të saktë për publikimin e albumit të ri, por rikthimi i saj në muzikë është tashmë i sigurt dhe i shumëpritur nga fansat në mbarë botën.