Aktori legjendar Robert De Niro ka dhënë një reagim publik për herë të parë pas rrëfimit të vajzës së tij, Airyn, e cila doli hapur si trangjinore në një intervistë për revistën “Them” më 29 prill. Në një koment për revistën “People”, fituesi i Oscar-it u shpreh me dashuri dhe mbështetje të plotë ndaj vajzës së tij:

“E kam dashur dhe mbështetur Aaron-in si djalin tim, dhe tani e dua dhe mbështes Airyn-in si vajzën time. Nuk e kuptoj pse bëhet kaq zhurmë,” tha De Niro, duke shtuar shkurtimisht: “I dua të gjithë fëmijët e mi.”

Airyn, 29 vjeçe, është një nga shtatë fëmijët e aktorit dhe vjen nga lidhja e tij me aktoren Toukie Smith, me të cilën De Niro ka edhe binjakun Julian.

Në intervistën e saj, Airyn tregoi sfidat personale që ka përjetuar që në fëmijëri, mes të cilave ndjesinë e të jetuarit “në hije” dhe disforinë trupore. Me një rrëfim emocional, ajo theksoi vështirësitë që ka hasur për shkak të stereotipeve dhe pritshmërive të shoqërisë:

“Gjithmonë më thoshin që isha ose shumë, ose jo mjaftueshëm për diçka: shumë e madhe, jo mjaftueshëm e dobët. Jo mjaftueshëm e zezë, jo mjaftueshëm e bardhë. Shumë femërore, jo mjaftueshëm mashkullore. Asnjëherë nuk më thanë thjesht: ‘Je tamam ashtu siç je’.”

Reagimi i De Niros është cilësuar nga ndjekësit dhe mbështetësit si një shembull i fuqishëm i dashurisë prindërore pa kushte dhe një mesazh domethënës për pranimin dhe përfshirjen në familje.