Sot, aktorja e njohur shkodrane Roza Anagnosti feston ditëlindjen e saj të 81-të, duke u nderuar si një nga figurat më të shquara të artit skenik shqiptar.

Roza Anagnosti filloi karrierën e saj në Teatrin “Migjeni” në Shkodër, ku, vetëm 20 vjeç, hyri në botën e kinematografisë me rolin e mësueses në filmin “Detyrë e posaçme” (K. Dhamo, 1963). Ky rol shënoi fillimin e një karriere të suksesshme që do të zgjaste dekada.

Me rreth 120 role të interpretuara në teatër, kinematografi dhe televizioni, Roza Anagnosti ka fituar admirimin e publikut dhe kritikëve. Ajo ka punuar me disa nga regjisorët më të njohur të teatrit dhe ka kontribuar në emisionet më të njohura në Radio dhe TV shqiptar.

Pas dhjetëra roleve në Teatrin “Migjeni”, Roza u martua me regjisorin Dhimitër Anagnosti në tetor të vitit 1964, dhe më pas u emërua aktore në Teatrin Popullor (tani Teatri Kombëtar). Kjo periudhë shënoi kulmin e karrierës së saj, me shumë role të rëndësishme që e bënë një aktore të kërkuar nga regjisorët.

Përveç titullit “Artiste e Merituar”, Roza ka marrë shumë vlerësime dhe çmime për kontributin e saj në artin shqiptar. Ajo ka luajtur mbi 20 filma dhe ka fituar çmime të rëndësishme kombëtare, duke e bërë çiftin Anagnosti një simbol të suksesit në artin shqiptar.

Në këtë ditë të veçantë, e gjithë Shqipëria i uron Roza Anagnostit një ditëlindje të lumtur dhe falënderon për kontributin e saj të çmuar në teatrin dhe kinematografinë shqiptare!