Rruga pranë liqenit të Gjinarit, në Bashkinë e Elbasan, ka pësuar dëmtime të dukshme si pasojë e një rrëshqitjeje toke, duke krijuar rrezik për qarkullimin e automjeteve dhe sigurinë e banorëve.

Sipas informacioneve nga zona, lëvizja e dheut ka dëmtuar shtresën e asfaltit në këtë segment, duke shkaktuar çarje dhe deformime në trupin e rrugës. Aksi konsiderohet jetik për komunitetin, pasi lidh disa fshatra të zonës së Gjinarit dhe përshkohet çdo ditë nga mjete private dhe automjete transporti.

Banorët shprehen se situata përbën rrezik real, sidomos gjatë orëve të mbrëmjes apo në kushte të motit të keq. Ata kërkojnë ndërhyrje të menjëhershme për stabilizimin e terrenit dhe rehabilitimin e plotë të segmentit të dëmtuar.

Gjinari, i njohur si një nga fshatrat turistikë më të frekuentuar të zonës, vijon të përballet me problematika infrastrukturore në akset lidhëse, pavarësisht investimeve të realizuara në qendër të fshatit. Në prag të sezonit pranveror dhe veror, kur fluksi i vizitorëve rritet ndjeshëm, rikthimi i sigurisë në këtë rrugë mbetet një domosdoshmëri për zhvillimin turistik dhe për lëvizjen e sigurt të banorëve.