Rreth 200 punonjës të Policisë, me gradat “nënkomisar”, “komisar” dhe “kryekomisar”, kanë shfaqur interes për të marrë pjesë në garën për pozitat drejtuese të 48 komisariateve në të gjithë vendin. Kjo garë përpozitën e shefit të komisariateve është e para e këtij lloji, pas ndryshimeve ligjore që janë bërë në ligjin për Policinë e Shtetit. Gara u mbyll ditën e premte, më 8 nëntor, me fazën e parë të aplikimeve.

Në mesin e kandidaturave, 10 prej tyre janë gra, të cilat synojnë të emërohen shefa komisariati, një procedurë që po realizohet për herë të parë. Komisioni që do të shqyrtojë këto kandidatura përbëhet nga tre gra, ndërsa çdo kandidaturë do të kalojë në një filtër të veçantë për të përmbyllur me intervistimet dhe përzgjedhjen përfundimtare të kandidatëve për pozitat drejtuese.

Pjesë e kësaj gare janë gjithashtu të gjithë shefat aktualë të komisariateve, përfshirë shefat e divizioneve të krimeve dhe rendit dhe sigurisë. Po ashtu, në Policinë e Shtetit u përmbyllën intervistat për 42 kandidatë për pozitat e drejtuesve të qarqeve. Ky proces, i cili është realizuar për herë të parë, pritet të përfundojë deri në fund të javës së ardhshme, duke shpallur zyrtarisht 12 drejtues të rinj, të cilët janë emëruar pas një procesi gare të zhvilluar.