Autoriteti Kombëtar i Ushqimit (AKU) ka njoftuar bllokimin dhe tërheqjen nga tregu të disa produkteve të formulës për fëmijë, pas një alarmi të ardhur nga Sistemi Evropian i Njoftimit të Shpejtë për Ushqimin (RASFF).

Sipas njoftimit, kontrolli i autoriteteve italiane ka konstatuar praninë e substancës Cereulide në formula për fëmijë me origjinë nga Holanda, një rrezik potencial për shëndetin e njeriut.

Produktet e prekura përfshijnë lotet e ndryshme të BEBA PRE 800G, BEBA 1 800G dhe BEBA SUPREME, me skadencë nga 04/2027 deri në 06/2027.

AKU bën me dije se sasia e produktit është bllokuar dhe do të asgjësohet, ndërsa konsumatorëve u bëhet thirrje që nëse e kanë blerë dhe e kanë ende në përdorim, ta kthejnë menjëherë në pikat e shitjes, duke shmangur çdo rrezik për fëmijët.