Të rinjtë janë kthyer në pacientët më të shpeshtë të mjekëve psikiatër, me një rritje të dukshme të rasteve. Një mjek psikiatër në Shqipëri kryen mesatarisht 25 vizita në ditë, ku pjesa më e madhe e pacientëve janë të moshës 20 deri në 40 vjeç. Problemi më i përhapur është ankthi, i cili ka një ndikim të thellë në cilësinë e jetës së individëve, duke përfshirë gjumin, oreksin, mendimin dhe emocionet.

“Jeta e një personi me ankth prishet cilësisht. Përjetohet humbje e gjumit, oreksit, irritim i shpejtë, dhimbje koke të shpeshta dhe ndjesi të ankthit klasik,” shpjegon një mjek psikiatër. Ndër shkaqet kryesore që prekin të rinjtë përfshihen problemet sociale dhe ekonomike, si dhe përdorimi i substancave.

Ankthi shpesh shkakton frikë dhe shqetësim të tepruar, duke ndikuar në jetën familjare, sociale, shkollë dhe punë. Mjekët theksojnë se ky çrregullim është i trajtueshëm, por shumë të rinj hezitojnë të përdorin medikamente për shkak të paragjykimeve. “Shumë të rinj besojnë se medikamentet krijojnë varësi, dhe kjo ide i bën të hezitojnë për të marrë ndihmën e duhur,” thotë një psikiatër.

Organizata Botërore e Shëndetësisë, në fushatat e saj të ndërgjegjësimit për shëndetin mendor këtë vit, ka vënë theksin tek rëndësia e krijimit të mjediseve mbështetëse në punë. Përmirësimi i mirëqenies mendore të të rinjve është një hap i rëndësishëm drejt rritjes së produktivitetit dhe përmirësimit të cilësisë së jetës së tyre.