Kryetari i Partisë Demokratike, Sali Berisha, ka reaguar fuqishëm pas bllokimit të segmentit rrugor Librazhd-Prrenjas, i cili ka lënë të bllokuar për orë të tëra qindra qytetarë dhe ka paralizuar trafikun në të gjithë juglindjen.

Në një postim në Facebook, Berisha hodhi poshtë versionin zyrtar që dëmtimin e rrugës e shkaktoi moti, duke e lidhur situatën me ndërhyrje të paligjshme dhe korrupsion. Ai akuzoi drejtpërdrejt ministren e Turizmit dhe Mjedisit, Mirela Kumbaro, si dhe ministren e Infrastrukturës Belinda Balluku për papërgjegjshmëri dhe lejim të ndërhyrjeve në shtratin e lumit pa modelin e studiuar të domosdoshëm.

Sipas Berishës:

“Ky bllokim është vepër totale e paligjshmërisë dhe korrupsionit. Ndërhyrja në lum jo vetëm që ka shkatërruar shtratin e tij, por ka dëmtuar edhe mbështetjen për rrugën ekzistuese dhe ka shkaktuar shembjen e saj sot. Përgjegjësia kryesore bie mbi Belinda Ballukun dhe Mirela Kumbaron, si dhe kompaninë që ndërhyri pa leje. Dënoj këtë veprim dhe heshtjen kriminale me forcë.”

Reagimi i Berishës ngre pikëpyetje të mëdha mbi cilësinë e mbikëqyrjes së investimeve rrugore dhe korrupsionin e supozuar që po dëmton infrastrukturën strategjike në vend.