Drejtori i Përgjithshëm i Policisë së Shtetit, Drejtues Madhor Muhamet Rrumbullaku, ka pritur në takim një delegacion të Zyrës Federale të Hetimit të SHBA-së (FBI), i shoqëruar nga drejtuesi i Programit Ndërkombëtar të Asistencës për Trajnimet mbi Hetimet Kriminale (ICITAP) në Ambasadën Amerikane në Tiranë, Richard Deasy.

Gjatë takimit, Rrumbullaku shprehu falënderime të thella për Qeverinë Amerikane dhe agjencitë e saj për asistencën e ofruar për Policinë e Shtetit. Ai nënvizoi bashkëpunimin profesional dhe të besueshëm në fushën e hetimit dhe goditjes së krimit dhe terrorizmit.

Drejtori i Përgjithshëm theksoi qasjen proaktive të Policisë së Shtetit ndaj krimit të organizuar dhe rëndësinë e bashkëpunimit me FBI-në për shkëmbimin e shpejtë dhe në kohë reale të informacionit, si dhe nevojën për angazhim nëpërmjet Skuadrave të Përbashkëta Hetimore.

Gjatë takimit, Rrumbullaku gjithashtu informoi delegacionin amerikan mbi rezultatet e aksionit më të fundit në bashkëpunim me palën britanike për goditjen e trafikimit të armëve.