Sekretari amerikan i Shtetit, Marco Rubio, deklaroi se takimet e sotme në Gjenevë kanë qenë “më produktivet dhe më domethënëset” e deritanishme në procesin e paqes për Ukrainën.

Ai njoftoi se ekipi amerikan po bën disa ndryshime në planin e paqes, duke u bazuar në sugjerimet e delegacionit ukrainas, dhe shtoi se puna ende nuk ka përfunduar, por ka pasur përparim të dukshëm.

“Kemi një dokument shumë të mirë pune, i ndërtuar mbi kontributet e të gjitha palëve të përfshira. Sot i kaluam pikë për pikë disa prej çështjeve dhe mendoj se kemi bërë përparim të mirë,” tha Rubio.

Ai shtoi se ekipet amerikane janë kthyer për të punuar mbi sugjerimet e paraqitura, me shpresën për të ngushtuar diferencat dhe për t’u afruar drejt një marrëveshjeje me të cilën Ukraina dhe SHBA-të do të jenë të kënaqura.

Rubio theksoi gjithashtu se çdo plan paqeje kërkon miratimin e presidentit Donald Trump, por u shpreh i qetë për zhvillimet e procesit.