Ish-kryeministri Sali Berisha ka shprehur bindjen se fati i opozitës do të jetë fitorja, duke theksuar se historia tregon se opozitat nuk janë mposhtur kurrë me burgje apo atentate. Në një konferencë për media, ai ka përgjigjur pyetjes së një gazetari lidhur me heqjen e imunitetit të deputetit, përfshirë atë të tij, duke e quajtur këtë një puç kushtetues. Berisha ka thënë se propozoi heqjen e imunitetit, por jo në mënyrë që të tjera institucione të marrin pushtetin e parlamentit. Ai ka insistuar se veprimi i kryer është një shkelje e Kushtetutës dhe e ka quajtur atë një përpjekje për të marrë pushtetin brenda shtetit për interesat e kryeministrit Edi Rama.

“Shumë thjesht, vetëm një gjë. Ju jeni gazetarët dhe është jashtëzakonisht e rëndësishme që në çështjet që kanë të bëjnë me ligjet, t’u referoheni ligjeve, për publikun e kam fjalën. Pse?! Shumë thjesht! Sepse Edi Rama nuk pranoi dhe unë, edhe para dhjetë ditëve, dy javësh, propozova hajde ta heqim! Ta abrogojmë!Ta abrogojmë, por jo ta pushtojnë të tjerët! Atë s’mund ta pranoj kurrë! Nuk mundet një gjykatës, një prokuror, të marrë pushtetin e parlamentit! Parlamenti vetë (kam qenë dhe jam) të abrogojë nenin 73, pika 2, që të mos ketë asnjë mbrojtje.Edhe nesër po ta sjellin, unë e votoj! Nuk kam ndryshuar qëndrim! Po s’mund të pranoj kurrë shkelmimin e Kushtetutës! Jo! Se në këtë rast është marrje pushteti! Është banditizëm! Është puç kushtetues! Është puç brenda shtetit!Për llogari të kujt?! Pse e bën ajo?! Pavarësisht se ata kanë rastisur persona që e kanë pësuar nga unë, po prapëseprapë ata s’e bënin kurrë atë përveçse për interesa të Edi Ramës”, deklaroi Berisha.