Në një fjalim të fuqishëm për anëtarët dhe mbështetësit e Partisë Demokratike, ish-kryeministri Sali Berisha theksoi rëndësinë e vitit 2026 si “vitin e sfidës më të madhe” për opozitën dhe të ardhmen e vendit.

“Ky është viti i provës së madhe, ky është viti i sfidës më të madhe që kemi patur ndonjëherë në jetën tonë politike, ky është viti më përcaktues për të ardhmen tonë dhe të ardhmen e Shqipërisë,” deklaroi Berisha.

Ai u ndal gjatë në përshkrimin e qeverisë aktuale, të udhëhequr nga Edi Rama, duke e akuzuar për “diktaturë autoritare, kontroll mbi mediat dhe lidhje me krimin dhe trafikun e drogës”.

“Ne kemi paraqitur me sukses para shqiptarëve dhe komunitetit ndërkombëtar të vërtetat dramatike të narko-shtetit. Ai ka krijuar një mburojë rreth aktivitetit të tij kriminal si patron i organizatës kriminale shtetërore më të rrezikshme të Europës – qeveria e tij,” tha Berisha, duke i bërë thirrje komunitetit ndërkombëtar të njohë këto lidhje.

Ish-kryeministri theksoi gjithashtu sukseset diplomatike të opozitës, duke përmendur miratimin e shtatë rezolutave ndërkombëtare në një periudhë 14-mujore, që sipas tij, dokumentojnë “tiparet e shëmtuara kryesore të narko-diktaturës së Edi Ramës”.

“Arritëm t’u faktojmë botës se ky demon pushteti kontrollon çdo qelizë të pushtetit në Shqipëri, përmes lidhjeve me krimin dhe drogën, dhe është një armik i egër i pluralizmit politik,” përfundoi Berisha, duke nënvizuar angazhimin për përballimin e këtij “pushteti të paligjshëm”.

Fjalimi i tij synonte të mobilizonte anëtarët e PD-së për aktivitetet dhe strategjitë e pritshme për datën 24 janar, duke e paraqitur këtë vit si një moment historik për opozitën shqiptare.