TIRANË – Kryetari i Partisë Demokratike, Sali Berisha, gjatë një takimi me përfaqësues të diasporës në selinë e PD-së, paralajmëroi për një krizë të thellë demografike dhe qeverisje që ai e cilësoi si diktatorial dhe shkatërrues për vendin.

Berisha prezantoi shifra alarmante mbi popullsinë shqiptare: “Nga viti 1990 deri në 2026, lindjet janë ulur 74%. Vjetërsimi i popullsisë ka ritme 300% më të shpejta se mesatarja europiane. Nëse vazhdohet kështu, pas 50 vitesh Shqipëria nuk do të ekzistojë si vend shqiptarësh.”

Lideri i opozitës denoncoi gjithashtu atë që e quajti “mburojë ligjore për vjedhjet”, duke akuzuar kryeministrin se përdor ligjin për të mbrojtur korrupsionin. Ai paralajmëroi se Bashkimi Evropian nuk mund të pranojë këtë model dhe mund të rikthejë procesin e integrimit në pikën zero.

Sipas Berishës, administrata është shndërruar në një mjet kontrolli, me rreth 240,000 të punësuar, krahasuar me 97,000 më parë, duke krijuar një varësi ekonomike që sipas tij pengon qytetarët të kundërshtojnë regjimin.

Ai u bëri thirrje shqiptarëve në vend dhe diasporë që të mobilizohen për mbrojtjen e votës dhe organizimin e protestave paqësore kundër regjimit Rama-Balluku. “Kjo betejë është fituese. Mediat ndërkombëtare po pasqyrojnë realitetin, sepse këtu po mbrohet korrupsioni,” përfundoi Berisha, duke bërë apel për veprim të menjëhershëm nga qytetarët dhe institucionet ndërkombëtare.