Sali Berisha bashkohet me protestuesit para Gjykatës së Lartë, duke refuzuar masën e ‘arrest shtëpie me mbikëqyrje policore’. Në fjalën e tij, ai kundërshton përdorimin e gjykatës si armë kundër opozitës dhe apelon për vëmendjen e shqiptarëve në mbrojtje të lirisë dhe demokracisë.

“Duke më hequr të drejtën e komunikimit mendojnë se do shpëtojnë nga kritikat dhe sulmet e merituara… Miqtë e mi, sot duhet të kërkojmë vëmendjen e çdo shqiptari, sepse kur gjykata përdoret si armë kundër opozitës, kjo është diktaturë. Kur i konfiskohet hapur logo dhe vula, dhe kërkohet t’i jepet një personi që është krahu i Ramës, kjo është diktaturë. Shqiptarë zgjohuni se po ndodh ajo që ka ndodhur në Rusi, Bjellorusi… jo diktaturë si ato të vjetrat me kampe përqendrimi, por diktaturë moderne me gjykata që burgosin opozitën. Kjo nuk është betejë e Berishës, ndonëse unë po burgosem në mënyrë të padrejtë, kjo është betejë për lirinë e shqiptarëve”, tha Berisha.