Ish-kryeministri Sali Berisha deklaroi se deri më tani nuk ka një vendim zyrtar për fillimin e protestave më datën 8 dhjetor, por theksoi se kur të fillojnë, ato do të jenë pa kthim. Në një konferencë për media, Berisha paralajmëroi se këto protesta do të jenë e jashtëzakonshme dhe do të karakterizohen nga mosbindja civile, një formë e re e shprehjes së pakënaqësisë qytetare.

“Nuk ka një vendim të tillë, por protestat kur të fillojnë nuk do ndalojnë. Beteja pa kthim, që do të thotë nuk do ndalojnë. Nuk do jenë protesta të zakonshme, do jenë protesta të mosbindjes civile që Shqipëria nuk ka njohur deri në sot,” tha Berisha.

Ai gjithashtu shtoi se në këtë moment, shqiptarët janë të revoltuar dhe se imagjinata e tyre po punon për të shprehur mosbindjen civile. Berisha theksoi se Parlamenti është shembulli më i gjallë dhe frymëzues për ata që duan të angazhohen në një betejë pa kthim për përmbysjen e regjimit aktual.

Deklaratat e Sali Berishës vijnë në një kohë kur tensionet politike janë të larta në Shqipëri dhe opozita ka shprehur pakënaqësi me performancën e qeverisë aktuale. Megjithatë, ende nuk ka një datë të konfirmuar për fillimin e protestave.