Kryetari i Partisë Demokratike, Sali Berisha, zhvilloi sot homazhe në nderim të Kryepeshkopit të ndjerë Anastas Janullatos, duke vendosur një kurorë me lule dhe duke shënuar një mesazh ngushëllimi në librin e shënimeve.

Pas homazheve, Berisha mori pjesë në shërbesën zyrtare të ceremonisë mortore të Kryepeshkopit, e cila u mbajt në Katedralen “Ngjallja e Krishtit” në Tiranë.

Në këtë ceremoni lamtumire, morën pjesë përfaqësues të lartë të komunitetit ortodoks, krerë të komuniteteve fetare në vend, diplomatë dhe zyrtarë të lartë shtetërorë. Të pranishëm ishin gjithashtu Presidenti i Republikës, Bajram Begaj, Kryeministri Edi Rama, Kryetarja e Kuvendit, Elisa Spiropali, dhe përfaqësues të tjerë të qeverisë shqiptare.

Ceremonisë iu bashkua edhe kryeministri grek, Kyriakos Mitsotakis, i shoqëruar nga ministra të kabinetit të tij qeveritar, si dhe Kryepeshkopi i Athinës.

Me pjesëmarrjen e besimtarëve dhe përfaqësuesve të lartë, kjo ceremoni ishte një shprehje e respektit dhe vlerësimit për figurën e Kryepeshkopit Anastas Janullatos, i cili shërbeu për dekada si udhëheqës i Kishës Ortodokse Autoqefale të Shqipërisë dhe la një trashëgimi të rëndësishme në jetën fetare dhe shoqërore të vendit.