Nga qelia nr. 6, ish-deputeti i Partisë Demokratike, Ervin Salianji, ka reaguar mbi lirimin e Sali Berishës, duke e cilësuar këtë zhvillim si një moment çlirues për demokratët dhe një pikë kthese për Partinë Demokratike në prag të zgjedhjeve.

Salianji e hap mesazhin e tij me tone ironike, duke sfiduar mënyrën se si është interpretuar lirimi i Berishës:

“Berishën nuk e liruan, u çlirua! Ishte një imponim që më pas shpërtheu si çlirim energjizues për demokratët dhe një grusht i fortë për kundërshtarët.”

Sipas tij, izolimi njëvjeçar i Berishës ishte një padrejtësi e rëndë, ndërsa lirimi i tij erdhi si rezultat i një presioni të dyfishtë, nga brenda vendit dhe nga faktori ndërkombëtar, duke përfshirë rezolutat e PPE-së dhe IDC-së. Salianji thekson se mungesa e zgjedhjeve të lira dhe izolimi i liderit të opozitës ishin faktorë që çuan drejt këtij çlirimi.

Në një thirrje drejtuar demokratëve, Salianji kërkon shmangien e dembelizmit politik dhe një angazhim maksimal në terren në muajt që mbeten deri në zgjedhje:

“Rikthimi i Berishës në zyrë duhet të shoqërohet me një mobilizim total. Nuk kemi luksin e fataliteteve të së shkuarës.”

Ai paralajmëron gjithashtu kundër çdo përpjekjejey për manipulim politik apo iluzione rreth marrëveshjeve të fshehta që mund të ndikojnë negativisht mbi motivimin e strukturave të PD-së. Sipas tij, euforia për rikthimin e Berishës duhet të shndërrohet në energji pozitive dhe veprim konkret:

“Euforia për Berishën nuk duhet të shndërrohet në një barrë për të. Ai ka treguar strategji dhe durim, por tani çdo demokrat duhet të bëhet pjesë aktive e kësaj beteje.”

Në përfundim, Salianji thekson rëndësinë e këtyre zgjedhjeve jo vetëm për Partinë Demokratike, por edhe për të ardhmen e vendit. Ai vë theksin te përdorimi i çdo momenti deri në ditën e votimeve:

“Koha është i vetmi aset që kemi njësoj si kundërshtarët tanë. Çdo sekondë duhet shfrytëzuar për të çuar mesazhin te çdo qytetar, sado larg apo i zhgënjyer të jetë.”

Me këtë letër të dërguar nga qelia, Salianji kërkon të frymëzojë një frymë të re energjie dhe bashkimi mes demokratëve, duke e vendosur lirimin e Berishës si simbol të një rrugëtimi të ri dhe shprese drejt fitores.