Në mbledhjen e sotme të Konferencës së Kryetarëve, Kryetarja e Kuvendit, Elisa Spiropali, propozoi që dy salla të mbledhjeve në ambientet e Kuvendit të emërtohen në nder të dy figurave të shquara, Bashkim Fino dhe Gerti Bogdani. Spiropali argumentoi se ky akt vjen si një mënyrë për të nderuar kontributin politik, shoqëror dhe parlamentar të dy personaliteteve, të cilët janë ndarë nga jeta.

Ajo shpjegoi se Bashkim Fino, i cili ka shërbyer si Kryeministër i Shqipërisë, ministër dhe deputet për gjashtë legjislatura, u nda nga jeta teksa ishte ende deputet i Kuvendit. Nga ana tjetër, Gerti Bogdani, deputet për dy legjislatura, ndërroi jetë në një moshë të re, duke lënë pas një trashëgimi të veçantë në politikë dhe shoqëri.

“Dëshiroj t’ju bëj me dije se kam vendosur që për të nderuar emrin dhe kontributin e këtyre dy personaliteteve, dy sallave të mbledhjeve në mjediset e ndërtesës së sallës së seancave të Kuvendit t’u vëmë emrin Bashkim Fino dhe Gerti Bogdani,” deklaroi Spiropali. Ajo u shpreh se është e bindur që propozimi do të mbështetet nga deputetët dhe anëtarët e Konferencës së Kryetarëve.