GRAMSH – Rasti i helmimit të fëmijëve në një kopsht publik në qytetin e Gramshit ka marrë përmasa më të gjera, ndërsa është konfirmuar se numri i të prekurve nga salmonela ka shkuar në 14. Sipas burimeve zyrtare dhe raportimeve të gazetarit Osman Stafa, një tjetër rast është konfirmuar sot, duke ngritur shqetësimin për një shpërthim të mundshëm infeksioni në institucionin parashkollor.

Ngjarja u bë publike një ditë më parë, pasi disa fëmijë të kopshtit përfunduan në spital me simptoma të rënda helmimi. Analizat laboratorike konfirmuan se të paktën katër prej tyre ishin të infektuar me bakterin e rrezikshëm Salmonella.

Pista kryesore e hetimit aktualisht është përqendruar te kompania private “Nelsa shpk”, e cila ka kontratë për furnizimin me ushqim të kopshtit në fjalë. Prokuroria ka nisur hetimet për të verifikuar nëse ushqimi i kontaminuar u ofrua nga kjo kompani dhe nëse janë shkelur standardet higjieno-sanitare.

Ndërkohë, autoritetet shëndetësore dhe strukturat përkatëse janë në terren për të kryer kontrolle të imtësishme në institucion dhe në ambientet e kompanisë furnizuese, ndërsa pritet edhe një raport përfundimtar mbi shkakun dhe përgjegjësitë.

Rasti ka ngjallur shqetësim te prindërit dhe komuniteti lokal, duke kërkuar masa të menjëhershme dhe përgjegjësi konkrete për sigurinë ushqimore në institucionet publike për fëmijët.