Samiti i liderëve të Ballkanit Perëndimor dhe Bashkimit Evropian do të mbahet të enjten, më 16 Maj, në Kotor të Malit të Zi. Gjatë këtij samiti, liderët e vendeve të rajonit, përfaqësues të Bashkimit Evropian dhe Shteteve të Bashkuara do të diskutojnë Planin e Rritjes për Ballkanin Perëndimor. Samiti do të organizohet nga kryeministri i Malit të Zi, Milojko Spajiç.
Takimi, i cili do të ndiqet nga Komisioneri Evropian për Fqinjësinë dhe Zgjerimin, Oliver Várhelyi, dhe Ndihmës Sekretari i Shtetit Amerikan për Evropën dhe Euroazinë, James O’Brien, është planifikuar të fillojë në orën 09:30. Samiti organizohet nën sloganin “Një rajon, vizion i përbashkët”.
Përveç liderëve dhe ministrave nga vendet e rajonit, në samit do të marrin pjesë edhe organizata partnere si Këshilli i Bashkëpunimit Rajonal, Banka Evropiane për Rindërtim dhe Zhvillim, Banka Evropiane e Investimeve, Banka Botërore, Komuniteti i Transportit, Aleanca Atlantike, Komuniteti i Energjisë, Fondacionet e Shoqërisë së Hapur, ReSPA, GIZ, përfaqësues të lartë të Komisionit Evropian dhe të tjerë.
Një ditë para Samitit, do të mbahet një takim i Ministrave të Çështjeve Evropiane dhe Financave të vendeve të Ballkanit Perëndimor, përfaqësuesve të Komisionit Evropian dhe organizatave partnere.
Muajt e fundit, në Shkup dhe Tiranë janë zhvilluar takime ministrore dhe samite rajonale të liderëve të Ballkanit Perëndimor. Në këto takime, udhëheqësit dhe ministrat e vendeve të rajonit, së bashku me përfaqësuesit e Bashkimit Evropian dhe Shteteve të Bashkuara, kanë diskutuar Planin e Rritjes për Ballkanin Perëndimor, i cili përfshin gjashtë miliardë euro grante dhe kredi për të përshpejtuar afrimin socio-ekonomik me Bashkimin Evropian. Plani përfshin dy miliardë euro grante dhe katër miliardë euro kredi të favorshme të garantuara nga BE.
