Mediat dhe komentatorët ukrainas nuk kanë kursyer kritikat ndaj samitit të mbajtur në Alaskë midis presidentit amerikan Donald Trump dhe homologut të tij rus Vladimir Putin. Editorialet e publikuara të shtunën e mëngjesit nga The Kyiv Independent e kanë cilësuar takimin si “neveritës, të turpshëm dhe të padobishëm”.

Gazeta thekson se Trump nuk arriti të zbatojë paralajmërimet për pasoja të rënda ndaj Rusisë, ndërsa Putini doli si fitues diplomatik, duke u pranuar dhe respektuar si një udhëheqës global, ndryshe nga trajtimi kritik i mëparshëm. “Paraardhësi i Trump e quante Putinin vrasës; Trump i ofroi atij një pritje mbreti,” shkruante editoriali.

Gazetarja ukrainase Kristina Berdinskikh përshkroi samitin me ironi: “Njëqind komplimente për Putinin, një qilim i kuq, avionë luftarakë në qiell dhe asgjë në fund.”

Politikanët dhe aktivistët ukrainas vunë në pikëpyetje efektivitetin e takimit. Deputeti Yaroslav Zheleznyak tha: “Duket se kemi qenë dëshmitarë të një hiçi tjetër të madhërishëm dhe të bukur amerikan.” Ndërsa aktivisti dhe ish-deputeti Mustafa Nayyem shtoi me ironi se Amerika “iu bashkua vullnetarisht radhës së gjatë të atyre që besonin se ishte e mundur të shtrëngoje duart me xhelatin pa i lyer duart me gjak.”

Për ukrainasit, samiti i Alaskës duket të ketë qenë më shumë një spektakël protokollesh dhe pompoziteti, sesa një hap real drejt armëpushimit apo zgjidhjes së konfliktit në Ukrainë.