Sekretari amerikan i Shtetit, Anthony Blinken, zbuloi në Këshillin e Sigurimit se ka kërkuar që javën e ardhshme të takohet me homologun rus, Sergei Lavrov.

Gjatë fjalës së mbajtur në OKB, Blinken deklaroi gjithashtu se SHBA-të propozojnë një takim të këshillit NATO-Rusi dhe këshillit të përhershëm të Organizatës për Siguri dhe Bashkëpunim në Evropë, në një përpjekje për të zgjidhur tensionet në kufijtë e Ukrainës “pa konflikt”.

Sipas Blinken, këto takime mund të “hapin rrugën” për një samit të liderëve kryesorë për të diskutuar shqetësimet reciproke të sigurisë.

“Si diplomatë ne kemi përgjegjësinë të bëjmë çdo përpjekje që diplomacia të ketë sukses dhe për këtë nuk duhet të lëmë asnjë gur pa lëvizur”- tha ai.

Blinken shtoi se SHBA-të besojnë se zbatimi i Marrëveshjes së Minskut është jetik për të siguruar një rrugë diplomatike.

Sipas tij SHBA-ja do të “lehtësohet” nëse paralajmërimet e saj për Rusinë janë të pasakta dhe parashikimet për një sulm të mundshëm të gabuara.