Sëmundjet virale të transmetuara nga mushkonjat po bëhen gjithnjë e më të zakonshme në Bashkimin Evropian, paralajmëron Qendra Evropiane për Parandalimin dhe Kontrollin e Sëmundjeve (ECDC).

Agjencia e BE-së thekson se virusi i Nilit Perëndimor dhe virusi “chikungunya” po shfaqen gjithnjë më shpesh në Evropë, duke krijuar një realitet të ri për shëndetin publik. Ky vit shënon një rekord të ri për virusin “chikungunya”, i transmetuar nga mushkonja tigër aziatike, me 27 shpërthime të raportuara deri tani. Një rast i infeksionit të kontraktuar lokal u regjistrua në Alsasë, Francë, në fillim të korrikut, duke treguar përhapjen e sëmundjes edhe në zona ku nuk ishte e zakonshme më parë.

Për virusin e Nilit Perëndimor, 335 raste dhe 19 vdekje janë raportuar deri në mesin e gushtit në tetë vende evropiane, me Italinë si vendi më i prekur (247 raste) dhe Greqinë me 35 raste. ECDC parashikon që numri i infeksioneve të rritet, me kulmin e transmetimeve që pritet të ndodhë në gusht ose shtator.

Agjencia e lidh përhapjen e këtyre sëmundjeve me kushtet klimatike të favorshme për zhvillimin e mushkonjave, ndërsa mushkonja tigër aziatike është tashmë e pranishme në 16 vende evropiane.

ECDC këshillon banorët dhe vizitorët, veçanërisht të moshuarit, fëmijët dhe personat me imunitet të dobët, të marrin masa mbrojtëse për të shmangur pickimet e mushkonjave.