Kampionia e tenisit Serena Williams ka rrëfyer për revistën People sfidën e saj të gjatë me peshën trupore, pas dy shtatzënive, dhe vendimin për të përdorur trajtimin inovativ me agonistët e receptorit GLP-1 – barna të krijuara fillimisht për diabetin e tipit 2, por që sot përdoren gjerësisht edhe për humbje peshe.

Williams pranoi se pas lindjes së vajzës së parë, Olympia, në vitin 2017, përjetoi një krizë personale, pasi nuk arriti të rikthente peshën e saj ideale, pavarësisht stërvitjes intensive dhe një diete të shëndetshme. Situata ndryshoi pas lindjes së vajzës së dytë, Adira River, në vitin 2023, kur kampionia vendosi të informohej mbi trajtimet më të fundit.

“Nuk arrita më të kthehesha në peshën që doja, çfarëdo që të bëja. Ishte shumë frustrues. Pas gjidhënies, vendosa të provoj terapinë GLP-1 dhe humba 14 kg. Tani jam më aktive, kyçet nuk më dhembin, dhe ndihem më në formë se kurrë,” – tha Williams.

Serena theksoi se para fillimit të terapisë u këshillua me mjekët dhe studioi në detaje efektet dhe rreziqet. Megjithatë, ajo thekson se trajtimi nuk është një “rrugë e shkurtër” për dobësim, por një ndihmë që funksionon vetëm bashkë me një stil jetese të shëndetshëm.

Agonistët e GLP-1, si semaglutidi dhe liraglutidi, rrisin ndjesinë e ngopjes, ngadalësojnë zbrazjen e stomakut dhe ndihmojnë në kontrollin e niveleve të sheqerit në gjak. Por mjekët paralajmërojnë se përdorimi i tyre kërkon mbikëqyrje të rreptë për shkak të efekteve anësore të mundshme, përfshirë probleme gastrointestinale, gurë në tëmth dhe pankreatit.

Pavarësisht transformimit fizik, Williams nënvizon rëndësinë e pranimit të vetes:
“Të shtosh ose të humbasësh peshë nuk duhet të ndryshojë mënyrën se si e shohim veten. Gratë gjykohen në çdo madhësi. Duhet të mësojmë ta duam veten në çdo formë dhe çdo etapë të jetës.”