Një ngjarje e rëndë ka tronditur qytetin Cheyenne në shtetin Wyoming, në Shtetet e Bashkuara të Amerikës, ku një 14-vjeçar është arrestuar dhe akuzohet për vrasjen e nënës së tij brenda banesës familjare.

Sipas autoriteteve, adoleshenti Havoc Leone dyshohet se qëlloi nga pas 41-vjeçaren Theresa McIntosh ndërsa ajo ndodhej në dhomën e tij. Hetuesit thonë se ngjarja mund të ketë ndodhur pasi i riu kishte vjedhur një tablet nga një klient i nënës së tij, e cila punonte duke pastruar shtëpi, dhe kishte frikë se vjedhja do të zbulohej pas një debati mes prindërve.

Sipas dokumenteve të hetimit, adoleshenti mori armën e nënës nga makina e saj dhe e përdori brenda shtëpisë. Trupi i gruas u gjet rreth një orë më vonë nga bashkëshorti i saj.

Ai u tha policëve se kishte dëgjuar një zhurmë ndërsa ndodhej në bodrum duke luajtur video-lojëra me kufje, por nuk e kishte menduar se ishte diçka serioze. Kur doli në katin e sipërm, ai pa djalin pranë dhomës së tij, i cili sipas policisë tha fillimisht se arma ishte shkrepur vetë.

Babai telefonoi shërbimet e emergjencës rreth orës 12:46 dhe u përpoq të ndihmonte bashkëshorten, por ajo nuk reagoi. Fillimisht rasti u raportua si vetëvrasje, por hetuesit nisën të dyshonin pasi 14-vjeçari dha deklarata të ndryshme gjatë marrjes në pyetje.