Të martën hynë në fuqi tarifat e reja amerikane ndaj mallrave kineze, me Kinën që reagoi menjëherë duke vendosur tarifa mbi importet amerikane si kundërpërgjigje.

Masat e Kinës përfshijnë:

•15% tarifë për qymyrin amerikan dhe gazin natyror të lëngshëm.

•10% tarifë për naftën e papërpunuar, makineritë bujqësore dhe disa lloje makinash.

Nga ana tjetër, Shtetet e Bashkuara vendosën një tarifë prej 10% për të gjitha mallrat kineze, një masë që Presidenti Donald Trump e justifikoi si një përpjekje për të detyruar Kinën të ndërmarrë hapa më të fortë për parandalimin e kontrabandës së fentanilit drejt SHBA-së.

“Shpresoj që Kina do të ndalojë së dërguari fentanil dhe nëse jo, tarifat do të rriten ndjeshëm,” tha Presidenti Trump.

SHBA e ka identifikuar Kinën si një burim kryesor të kimikateve që përdoren nga kartelet meksikane për të prodhuar fentanil, ndërsa Pekini pretendon se ka marrë masa për të frenuar industrinë dhe tregtinë e paligjshme të drogës.

Sakaq, Presidenti Trump ka shtyrë për një muaj tarifat 25% për Meksikën dhe Kanadanë, pas bisedimeve me presidenten meksikane Claudia Sheinbaum dhe kryeministrin kanadez Justin Trudeau. Ai gjithashtu pritet të zhvillojë një bisedë me presidentin kinez Xi Jinping në ditët në vijim, sipas zëdhënëses së Shtëpisë së Bardhë, Karoline Leavitt.