Furnizimi i mundshëm i Iranit me raketa balistike për Rusinë paraqet një “përshkallëzim dramatik” të mbështetjes së Teheranit për Moskën dhe do të sjellë “pasoja dramatike” nga Shtetet e Bashkuara, paralajmëroi të hënën Departamenti Amerikan i Shtetit. Zëdhënësi i këtij departamenti, Vedant Patel, theksoi se çdo transferim i tillë i raketave do të përfaqësonte një përshkallëzim të rëndësishëm në mbështetjen e Iranit për agresionin rus në Ukrainë.

Ministria e Jashtme e Ukrainës ka reaguar ashpër ndaj këtyre raportimeve, duke thirrur një diplomat të lartë iranian në një takim urgjent dhe duke i tërhequr vërejtjen për pasojat e rënda dhe të pariparueshme që një veprim i tillë mund të ketë në marrëdhëniet dypalëshe. Megjithatë, zyrtari iranian Shahriar Amouzegar i hodhi poshtë raportimet, duke i quajtur ato “luftë psikologjike,” ndërsa zyrtarë të BE-së i kanë cilësuar informacionet si të besueshme.

CNN dhe Wall Street Journal raportuan javën e kaluar se Irani kishte dërguar raketa balistike me rreze të shkurtër veprimi në Rusi, një zhvillim që ka rritur tensionet në rajon dhe ka shkaktuar reagime të forta nga Ukraina dhe aleatët perëndimorë.

Komandanti i lartë i Gardës Revolucionare të Iranit, Fazlollah Nozari, mohoi çdo përfshirje, duke deklaruar se “Irani nuk përkrah asnjërën nga palët në konfliktin ndërmjet Ukrainës dhe Rusisë.” Pavarësisht kësaj, zyrtarë perëndimorë dhe ukrainas kanë shprehur dyshimet e tyre, duke pohuar se Irani ka furnizuar më parë Rusinë me pajisje ushtarake, përfshirë dronët ‘Shahed’.

Përfaqësues të BE-së dhe NATO-s kanë paralajmëruar gjithashtu për pasojat e rënda që mund të rezultojnë nga dërgesa e raketave balistike iraniane në Rusi, duke e cilësuar atë një përshkallëzim të rëndësishëm të mbështetjes iraniane për luftën në Ukrainë. Aleatët perëndimorë po shqyrtojnë mundësinë e masave të reja ndëshkuese ndaj Iranit nëse informacionet konfirmohen.