Administrata e presidentit amerikan, Donald Trump, ka miratuar vazhdimin e programit kompakt të Korporatës së Sfidës së Mijëvjeçarit (MCC) për Kosovën – një projekt që synon të përmirësojë sektorin e energjisë në vend.

Lajmi u konfirmua nga presidentja e Kosovës, Vjosa Osmani, e cila bëri të ditur se është njoftuar zyrtarisht nga zëvendëssekretari amerikan i Shtetit, Christopher Landau.

“Lajm i shkëlqyeshëm për Kosovën! Mirënjohje e thellë për Shtetet e Bashkuara të Amerikës”, shkroi Osmani në një postim në Facebook.

Gjatë vizitës së saj në SHBA në korrik, Osmani kishte kërkuar zyrtarisht vazhdimin e këtij programi, i cili nisi të zbatohej në prill 2024 dhe ka për qëllim zhvillimin e projekteve të energjisë së pastër.

Programi kompakt ka një vlerë totale prej 236.7 milionë dollarësh, prej të cilave 202 milionë vijnë nga MCC dhe 34.7 milionë janë kontribut i Qeverisë së Kosovës.