Departamenti i Shtetit të SHBA-së ka deklaruar se nuk do të hezitojë të ndërmarrë çdo veprim të nevojshëm për të mbrojtur personelin dhe qytetarët amerikanë në Kosovë. Ky paralajmërim u bë nga zëvendës zëdhënësi kryesor i Departamentit të Shtetit, Vedant Patel, gjatë një konference për media ditën e djeshme. Komenti erdhi pas qëndrimit të qeverisë së Kosovës për hapjen e urës së Ibrit në Mitrovicë.

SHBA-ja, së bashku me BE-në dhe aleatët e tjerë të Kosovës, kanë kërkuar që qeveria të mos ndërmarrë veprime të njëanshme që mund të rrezikojnë stabilitetin. Ambasadori amerikan në Kosovë, Jeffrey Hovenier, ka paralajmëruar se një veprim i tillë mund të rrezikojë jetën e ushtarëve amerikanë në kuadër të KFOR-it dhe ka kërkuar nga qeveria të mos vazhdojë me planin në këtë kohë. Në anën tjetër, qeveria e Kosovës ka deklaruar se hapja e urës nuk përbën rrezik për askënd në vend.