Uashington – Tensionet në Lindjen e Mesme po arrijnë një pikë kritike. Zyrtarë të lartë amerikanë, duke folur për Reuters, kanë deklaruar se Shtetet e Bashkuara besojnë se Irani mund të ndërmarrë një sulm hakmarrës ndaj forcave amerikane në rajon brenda 48 orëve të ardhshme, si përgjigje ndaj sulmeve ajrore të së shtunës.

“Ka indikacione të forta se Irani po përgatitet të godasë objektiva ushtarake amerikane”, tha një nga burimet.

SHBA-të goditën të shtunën tre objekte bërthamore nëntokësore në Iran, një veprim që ka rritur frikën për një përshkallëzim të madh ushtarak në rajon. Megjithëse administrata amerikane është në kërkim të një zgjidhjeje diplomatike, përballë një përgjigjeje të mundshme iraniane, masat ushtarake janë rritur ndjeshëm.

Trump kërkon përgjigje më të fortë

Edhe pse gjatë fushatës së tij zgjedhore të kaluar Presidenti Donald Trump premtoi shmangien e “luftërave të përjetshme”, pas zhvillimeve të fundit ai paralajmëroi për një hakmarrje të fortë iraniane dhe kërkoi që përgjigjja amerikane të jetë më e ashpër në rast të një sulmi të ri.

“Ne nuk do të tërhiqemi. Çdo veprim agresiv do të marrë një përgjigje të dyfishtë”, tha Trump për mediat.

40,000 trupa në rrezik – lëvizje në bazat ushtarake

Gjenerali Dan Kaine, Kryetar i Shtabit të Përbashkët të Ushtrisë, deklaroi se masat mbrojtëse për trupat amerikane në rajon janë rritur, përfshirë në Irak dhe Siri, ku prania ushtarake amerikane është e konsiderueshme.

Aktualisht në Lindjen e Mesme janë të vendosur rreth 40,000 trupa amerikane, të pajisur me avionë luftarakë, sisteme mbrojtëse ajrore dhe anije luftarake, por zyrtarët pranojnë se pozicionet mbeten të cenueshme ndaj sulmeve me raketa ose dronë iranianë.

Për të zvogëluar rrezikun, Pentagoni ka zhvendosur disa njësi ajrore dhe detare nga baza kryesore në Al Udeid, Doha, që strehon rreth 10,000 ushtarë, drejt pozicioneve më të sigurta në rajon.

Frika nga përshkallëzimi

Këto zhvillime vijnë në një moment delikat për rajonin dhe botën, ku çdo sulm i ri mund të ndezë një konflikt më të gjerë, me pasoja të paparashikueshme. Uashingtoni zyrtar po përpiqet të ruajë ekuilibrin mes mbrojtjes së interesave të tij dhe shmangies së një përplasjeje të drejtpërdrejtë me Teheranin.

Ndërkohë, komuniteti ndërkombëtar ndjek me shqetësim situatën, duke bërë thirrje për përmbajtje, dialog dhe respektim të së drejtës ndërkombëtare.