Një 38-vjeçar nga Shëngjini është shpallur në kërkim nga policia, pasi akuzohet për mashtrim ndaj një personi që i kishte humbur babai.

Sipas njoftimit të Drejtorisë Vendore të Policisë Lezhë, E.M., 38 vjeç, i kërkoi para një 46-vjeçari, G.N., me pretendimin se dinte vendndodhjen e babait të tij, i cili ishte i humbur prej dy muajsh.

Pas kallëzimit të bërë nga viktima, specialistët e Komisariatit të Policisë Lezhë referuan materialet në Prokurori dhe nisën procedurat për shpalljen në kërkim të autorit të dyshuar.

Policia kërkon që çdo informacion mbi vendndodhjen e E.M. të bëhet i ditur menjëherë, duke theksuar se ky rast konsiderohet i rëndë për shkak të shfrytëzimit të situatës së dhimbshme të familjes.